A urtean
I. Irakurgaia
Lehen gurasoen sortzea eta hareen pekatua.
Hasiera liburutik
Has 2, 7-9; 3, 1-7
Jainko Jaunak gizona moldatu eban lurreko
hautsez eta bizi-arnasa bota eutson sudur-zuloetara, eta gizona bizidun bihurtu
zan.
Gero,
Jainko Jaunak baratze bat landatu eban Edenen, sortalderantz, eta han ipini
eban berak moldatutako gizona. Jainko Jaunak mota guztietako zuhaitzak sortu
ebazan lurretik, begientzat eder eta ahoarentzat gozo, eta baratzearen erdian
biziaren zuhaitza eta onaren eta txarraren ezagutza emoten eban zuhaitza
landatu ebazan.
Sugea zan Jainko Jaunak egindako piztietan
maltzurrena. Sugeak esan eutson emakumeari: «Galarazo egin ei deutsue Jainkoak
baratzeko arbola guztietako frutuetatik jatea».
Emakumeak erantzun eutson: «Baratzeko
zuhaitzen frutuetatik jan daikegu; baratze erdian dagoan zuhaitzaz bakarrik
esan deusku Jainkoak: "Horretatik ez jan, ezta ikutu be hori, hil nahi ez
badozue"».
Sugeak esan eutson emakumeari: «Ez zarie
hilko, ez! Ondo daki Jainkoak, horretatik jan orduko, begiak edegiko jatzuezala
eta bera lakoak izango zariela, onaren eta txarraren ezagutzaren jaube».
Emakumeak, zuhaitza jateko gozo eta
begientzat eder eta ezaguera lortzeko ona zala ikusirik, haren frutuetako bat
hartu eta jan egin eban; gero, senarrari emon eutson eta harek be jan egin
eban. Orduan begiak edegi jakezan eta narru gorri egozala ohartu ziran. Iko-orri
batzuk josi eta estalki bana egin eben.
Jaunak esana.
Erantzun Salmoa
Sal 51 [50], 3-4. 5-6ab. 12-13. 14 eta 17 (R/. ik. 3a)
R/. Erruki, Jauna, pekatu egin dogu-eta.
V/. Erruki nitaz, ene Jainko, zeure maitasunaz,
kendu
nire hobena zeure neurribako errukiaz.
Garbitu
nagizu zeharo neure errutik,
garbitu
neure pekatutik. R/.
V/. Autortzen dot, bai, neure hobena,
begi
aurrean dot eten barik neure pekatua.
Zure
aurka, zure aurka bakarrik, egin dot pekatu,
zure
begietan oker dana egin dot. R/.
V/. Ene Jainko, sortu bihotz garbia nigan,
barritu
arnasa sendoa nire barruan.
Ez
nagizu bota zeure aurretik,
ez
kendu niri zeure arnasa santua. R/.
V/. Poztu nagizu barriro zeure salbazinoaz,
sendotu
nagizu zeure arnasa oparoaz.
Edegi,
Jauna, nire ezpanak,
eta
nire ahoak iragarriko dau zure gorespena. R/.
II. Irakurgaia
II. irakurgai hau era laburrean ik. honen ondoren.
Pekatua ugaritu bazan,
askoz ugariago
zabaldu zan onginahia.
San Paulo Apostoluak Erromatarrei egindako epistolatik
Erm 5, 12-19
Senideok: Gizon baten bidez sartu zan
pekatua munduan, eta pekatuaren bidez heriotza; holan, heriotza gizaki
guztiengana zabaldu zan, guztiek egin ebelako pekatu. Egia da legea baino lehen
bazala pekatua munduan; baina pekatua ez jako inori ezartzen, legerik ez
badago. Halan be, Adamengandik Moisesenganaino nagusi izan zan heriotza
gizakien gain, baita Adamen hutsegitearen antzeko pekaturik egin ez ebenen gain
be. Adam etortzekoa zanaren irudi da.
Baina Jainkoaren dohaiagaz ez da pekatuagaz
lez jazotzen. Izan be, gizon bakar baten pekatuaz danak hil badira be, askoz
ugariago zabaldu da danentzat
Jainkoaren grazia eta dohaia, beste gizon bakar bati esker, hau da, Jesu
Kristori esker. Eta ondorioei dagokienez be, Jainkoaren dohaiagaz ez da gizon
bakarraren pekatuagaz lez jazotzen. Izan be, pekatuak, bakarra izan arren,
danen gatxespena izan dau ondorio; dohaiak, barriz, pekatuak asko izan arren,
danen parkamena.
Gizon bakarraren pekatuagaitik heriotza
nagusitu bazan, zenbatez gehiago ez ete dira betiko bizian nagusi izango bakar
bategaitik, Jesu Kristogaitik, salbazinoaren grazia eta dohai oparoa hartzen
dabenak!
Beraz, baten pekatuak gizaki guztiei
gatxespena ekarri eutsen lez, baten leialtasunak gizaki guztiei salbazinoa eta
bizia ekarri deutse. Eta baten obedientzia ezagaitik guztiak pekatari egin
ziran lez, baten obedientziagaitik guztiak zuzen egingo dira.
Jaunak esana.
II. irakurgaia era laburrean
Pekatua ugaritu
bazan,
askoz ugariago
zabaldu zan onginahia.
San Paulo Apostoluak Erromatarrei egindako epistolatik
Erm 5, 12. 17-19
Senideok: Gizon baten bidez sartu zan
pekatua munduan, eta pekatuaren bidez heriotza; holan, heriotza gizaki
guztiengana zabaldu zan, guztiek egin ebelako pekatu.
Gizon bakarraren pekatuagaitik heriotza
nagusitu bazan, zenbatez gehiago ez ete dira bakar bategaitik, Jesu
Kristogaitik, nagusi izango betiko bizian salbazinoaren grazia eta dohai oparoa
hartzen dabenak!
Beraz, baten pekatuak gizaki guztiei
gatxespena ekarri eutsen lez, baten leialtasunak gizaki guztiei salbazinoa eta
bizia ekartzen deutsez. Eta baten obedientzia ezagaitik guztiak pekatari egin
ziran lez, baten obedientziagaitik guztiak zuzen egingo dira.
Jaunak esana.
Ebanjelio aurreko txatala
Mt 4, 4b
V/. Gizakia ez da ogiz bakarrik bizi,
Jainkoaren
ahotik urteten dauan hitz guztitik baino.
Ebanjelioa
Jesusek barau
egin berrogei egunez,
eta tentaldiak
jasan.
✠ Jesu Kristoren Ebanjelioa San Mateoren liburutik
Mt 4, 1-11
Aldi haretan, Espirituak basamortura eroan
eban Jesus, deabruak tentatu egian. Berrogei egun eta berrogei gau baraurik
egon ostean, azkenean gosetu egin zan.
Hurreratu jakon tentatzailea eta esan
eutson: «Jainkoaren Semea bazara, esaizu harri honeek ogi bihurtu daitezala».
Jesusek erantzun eutson: «Liburu Santuan
idatzia dago: “Gizakia ez da ogiz bakarrik bizi, Jainkoaren ahotik urtetan
dauan berba guztitik baino”».
Orduan, deabruak uri santura, Jerusalemera,
eroan eban eta tenpluaren goreneko ertzean ipinirik, esan eutson: «Jainkoaren
Semea bazara, bota egizu zeure burua goitik behera, idatzita dago-eta: “Bere
aingeruei agindu deutse zu jagoteko”, eta “eskuetan eroango zaitue, harriakaz
estropezu egin ez dagizun”».
Jesusek erantzun eutson: «Beste hau be
idatzita dago: “Ez tentatu Jauna, zeure Jainkoa”».
Orduan, deabruak mendi handi batera eroan
eban eta, munduko erreinu guztiak eta hareen edertasuna erakutsiz, esan eutson:
«Hori guztiori emongo deutsut, ahuspez gurtzen banozu».
Orduan Jesusek esan eutson: «Alde hemendik,
Satanas! Idatzita dago-eta: “Jauna zeure Jainkoa gurtuko dozu eta bera bakarrik
zerbiduko”».
Orduan, deabruak itzi egin eban, eta aingeruak
hurreratu jakozan zerbitzera.
Jaunak esana.