GARIZUMAKO V. DOMEKA
C urtean
Nahiago bada, A urteko domeka honetako irakurgaiak hartu daitekez.
I. Irakurgaia
Dana barri egitera
noa,
eta edaten emongo
deutsat neure herriari.
Isaias Profetaren liburutik
Is 43, 16-21
Hauxe dino Jaunak:
Jaunak bidea
zabaldu eban itsasoan,
bidezidorra ur
oldartsuetan;
gurdi eta zaldi,
gudaroste ahaltsua atara eban gudura;
hara, jausi dira
arerioak, barriro ez jagitzeko,
amatatu dira,
amaitu, kandela-metxa lez.
«Ez gogoratu lehenaldian jazotakoez, ez
gogoratu antxinakoez.
Begira, dana barri
egitera noa:
hasi da sortzen,
ez deutsazue igartzen?
Bidea edegiko dot
basamortuan, ibaiak landa lehorrean.
Basapiztiek,
txakal eta ostrukek goratuko nabe,
ura emongo dot-eta
basamortuan,
ibaiak sortuazoko
landa lehorrean,
neure herriari,
neure aukeratuari, edaten emoteko.
Eta neuretzat
eratu dodan herriak
nire gorapena
iragarriko dau».
Jaunak esana.
Erantzun salmoa
Sal 126 [125], 1-2b. 2c-3. 4-5. 6 (R/. 3)
R/. Gugaz handikiro jokatu dau Jaunak:
hau
da poza daukaguna!
V/. Jaunak Sionen zoria aldatu ebanean,
amesetan lez
gengozan.
Barrez bete jakun
orduan ahoa,
poz-oihuz mihina. R/.
V/. Jentil-herrietan be esan eben:
«Handikiro jokatu dau Jaunak hareen alde».
Handikiro jokatu
dau Jaunak gure alde,
eta pozarren
gagoz! R/.
V/. Aldatu, Jauna, gure zoria,
euri-jasek
basamortua lez.
Malkoz erein
ebenek
pozez batzen dabe.
R/.
V/. Negarrez joan ziran,
hazi-zorroa
eroanez;
poz-oihuka datoz,
gari-azaoak
ekarriz. R/.
II. Irakurgaia
Kristogaitik dana
galdu neban,
eta haren antzeko
bihurtu nahi dot heriotzan.
San Paulo Apostoluak Filipoarrei egindako epistolatik
Flp 3, 8-14
Senideok: Nire ustez, ez dau ezerk ezer
balio Kristo Jesus nire Jauna ezagutzearen neurribako ondasunaren aldean.
Kristogaitik dana galdu neban eta dana zaborraren pareko jotzen dot, ha
irabaztearren eta haregaz bat eginda bizitzearren. Ez naz neurez salbatzen, hau
da, legea betetzeagaitik, Kristogan sinisteagaitik baino, Jainkoak sinismenaren
bidez salbatzen naualako. Kristo ezagutu nahi dot, haren biztueraren indarra
neugan sumatu eta haren nekeetan partaide izan gura dot, haren antzeko bihurtu
heriotzan, holan hildakoen biztueran be parte izango dodan itxaropenez.
Ez dot esan nahi hori lortu dodanik edota
helmugara heldu nazanik; baina lehian jarraitzen dot ea eskuratzen dodan,
Kristo Jesusek ni neu eskuratu ninduan lez. Senideok, ez dot uste oraindino
eskuratu dodanik; baina, atzean gelditu danaz ahazturik, aurrera jotzen dot eta
helbururantz lehiatzen naz, saria lortzeko; horretara deitzen deust-eta
Jainkoak goitik, Kristo Jesusen bitartez.
Jaunak esana.
Ebanjelio aurreko txatala
Ik. Jl 2, 12-13
V/. Hauxe dino Jaunak:
Bihurtu
zaiteze Nigana bihotz-bihotzez,
bihozbera
eta errukitsua naz-eta.
Ebanjelioa
Zuen artean pekatu
barik dagoanak
bota deiola
lehenengo harria.
✠ Jesu Kristoren Ebanjelioa San Joanen liburutik
Jn 8, 1-11
Aldi haretan, Jesus Oliamendira joan zan.
Biharamon-egunsentian, ostera, tenplura agertu zan barriro, eta herri guztia
etorri jakon; Jesus jesarri eta irakasten hasi jaken.
Lege-maisuek eta fariseuek adulterioan
harrapatutako emakume bat ekarri eutsoen eta, erdian ipiniz, esan eutsoen
Jesusi: «Maisu, hau emakumeau adulterioan ziharduala harrapatu dabe. Moisesek
horrelakoak harrika hiltzeko agindu euskun legean. Zuk zer dinozu?» Azpikeriaz
esaten eutsoen hori, zertan salatu izateko.
Jesus, ostera, makurtu eta atzamarrez
lurrean idazten hasi zan. Baina hareek itaundu eta itaundu ebilkozanez, zutundu
eta esan eutsen: «Zuen artean pekaturik barik dagoanak bota deiola lehenengo
harria». Eta, barriro makurturik, lurrean idazten jarraitu eban. Hareek, hori
entzutean, banan-banan alde egiten hasi ziran, zaharrenetatik hasita. Jesus
bakarrik gelditu zan, emakumea aurrean ebala.
Jesusek, zutunduta, esan eutson: «Emakume,
non dira salatzaileak? Ez zaitu inork kondenatu?» Harek erantzun: «Inork be ez,
Jauna». Orduan Jesusek: «Ezta Neuk be, ez zaitut kondenatzen. Zoaz eta ez egin
barriro pekaturik».
Jaunak esana.